Prouvènço e catalougno : resumi de l'istori d'uno freirejacioun e Raconte dou viage di Felibre en Catalougno : 3-4-5 d'outobre de 2008

Ce que dit l'éditeur

La Catalougno e la Prouvènço soun ligado despièi de tèms e de tèms. Istouricamen li liame remonton à 1112 quand Douço de Prouvènço se marrido emé lou comte Ramoun-Berenguié III de Barcilouno. Li dous païs rèston liga direitamen fin qu'à la mort de Ramoun-Berenguié V en 1245.

Pièi li vènt de l'istòri boufèron de tau biais que Catalougno e Prouvènço semblavon agué perdu tout liame. Mai i'aguè lou Felibrige, lou miracle de Mirèio. Li catalan s'enfiouquèron pèr aquelo obro, retroubèron lou camin de Prouvènço e tourna-mai li dous pople se faguèron la brassado. La remembranço dóu passat, la desiranço d'un aveni souleious pèr li pople e li lengo encadena faguèron bèu camin à la freirejacioun retroubado entre Catalougno e Prouvènço. En 1867 li felibre recatèron en Prouvènço de catalan foro-bandi de soun païs. En 1868, Mistral e quàuquis un de sis ami fuguèron reçaupu coume d'orne d'estat en Catalougno, desenant li liame se desfaguèron plus. En signo d'amista, de coupo fuguèron escambiado. Fin de manteni aquéli liame d'amista, de freirejacioun entre li dos lengo, entre li dous pople, en 2008 li felibre tournèron en Catalougno pèr faire se rescountra enca 'n cop li dos coupo.

Aquéu librihoun pourgis un resumi de l'istòri d'aquelo freirejacioun, lou raconte dóu viage di Felibre en Catalougno di 3, 4, 5 d'óutobre 2008, li dicho dóu Capoulié dóu Felibrige e dóu sòci Enri Garriga Trullols que ié fuguèron prounounciado, emai lou tèste de la counferènci dóu Proufessour Jaume Figueras Trull countant e analisant lou viage de Mistral e di felibre en 1868.